Poimtrogn

Text

Poimtrogn

40 Tag hat Jesus in da Wüste gfast
nacha hat a beschlossn, dass as iatz lasst,
bevua a dahungascht geht a wieda unta d'Leit
zan vakundn und predegn weaschts a wieda Zeit.

Des hät a sih owa net vahofft wia a nach Jerusalem kemma is
der Jubi um eahm der Zuagnag und des Gris;
mit Poimzweig hams gwunkn und laut Hosianna gschrien,
bis heit es des Fest ins an Poimsunntag dahoitn bliem.
Ölzweig trag ma a de Kirch zan weichn und Buschn mit Breze und bunte Bandln,
Tirola Brauchtum is a dabei des söd owa de Biblisch Gschicht net vaschandln.

So es des früahra a reine Buamasach gwen,
da hats unta de Poimtroga koa onzigs Dirndl fei gem,
wei de junga Manda bei den Brauch eahna Kraft gmessn ham
wia greaßa de Kraft, wia länga de Stang.
Z'hegst om hams den schea aufputztn Poimbuschn ubundn
a drei a viere ham sih oft mit oa Poimstang agschundn.

De Karglbuam hams gar amoi übatriem
vo lauta Angst, dass sist nimma Hagmoar wan bliem;
awa a da Kirch drei gehts onascht, wia se hätn wön
da Bam is a Trumm z'lang, dassn ham nimma kinna grad aufstön.
S'Himmiloch auftoa hat eah da Pfarra  schliaßlich dalab,
dass iatz nu was schief geah kunt ham se seh koa bisse net grab.

Awa de Konkurentn, ih mechts heit gar nimma nenna,
sen vo lauta Neid auf an teiflischn Plan wegn den kemma.
Se sen ganz hoamlich an Dachbodn aufigschlichn,
wia da Mesna wegn an Sammen aus da Sakristei a Bois is gwichn.
Mit an Sagl hams da om an Buschn agschnidn,
ganz giade freila da häts koan Nagla dalidn.

Kost da denkn was des für a Überaschung is gwen
wias de Stang ham müaßn unt ausziachn und zan Auszug umlegn.
Kruzitürgn, hätns boid gar gfluacht, da is ja koa Buschn mehr dru
dia kinnan sih gfrein, se kemman scho drauf wer eah den Duck hat utu.
S'örgst is aft nu gwesn wia d'Leit auf da Kirchgass gspott ham und glacht,
vo doscht u hat an Poimbuschn auf so a langa Stang neamb mehr ugmacht.